لماذا أدون ؟؟!!

رجاء هام : إذا كنت لا تحب الصراحة ، أستأذنك بألا تقرأ هذا الموضوع .
..........................................................
* لمـــاذا أدوّن ؟؟؟

توارد هذا السؤال على ذهني كثيرا - وقد يكون أحد أسباب انقطاعي عن التدوين الفترة الماضية -

* ياترى ليه بأدوّن ، وليه أنشأت مدونة أصلا ؟؟؟

يمكن يكون السؤال ده مش في محله دلوقتي !! يمكن كان المفروض أسئله لنفسي قبل ما أعمل مدونة !!! ويمكن لازم أفكر فيه وأذكر نفسي دايما بيه !!!!

- هل عشان أفضفض وأخرج ما بداخلي ...
- ولا باكتب مذكراتي اليومية ، والسلام ...
- يا ترى عشان فيه رسالة معينة عايز أوصلها ، ومعنى محدد نفسي الناس تعرفه !!!
- ولا بأحاول أكون علاقات اجتماعية وباستغل المدونة في كده !!!
- يمكن عشان المدونات والتدوين بقى موضة ، ولازم الواحد يساير الموضه - عشان ما يبقاش متخلف ؟!!
- ولا يمكن أنا شفت في نفسي إني مش أقل من زملائي المدونين اللي على الساحة اللي أنشؤوا مدونات أصبحوا بها مؤلفين لكتب وقصص تنشر وتباع في معارض الكتب ؟!!
- يا ترى أنا بأدون لأجل التدوين ، ولا في هدف أسمى وأغلى بأكتب عشانه ؟؟؟

كل الإجابات دي دارت بيني وبين نفسي ... وكان لازم ألاقي إجابة للسؤال اللي ذكرته في البداية ، وإلا يكون كل ما أكتبه ليس له معنى أو هدف .

* لمـــــــــــــــــــاذا أدوّن ؟؟؟

ياترى كل واحد مننا سأل نفسه السؤال ده ؟! وهل لقينا له إجابة عندنا ؟؟
طب هل أنا مقتنع بإجابتي دي ، ومستعد أحاسب أمام الله عز وجل عن كل كلمة كتبتها وباكتبها في مدونتي ...

* ويا ترى لما بأرد عند حد في مدونته على أي موضوع بيكون فعلا الموضوع شدني وعندي رد عليه وحاسس إن ردي هيفيد وهيثري الموضوع ، ولا بيكون ردي ده مجامله ، ، ولا يمكن بأرد عشان يجي يقرأ موضوعي ويرد علي ؟؟؟

كل دي أسئلة .. أعتقد - والله أعلم - ضروري كل واحد مننا يفكر فيها كويس طول ماهو في عالم التدوين الواســــــــــــــــــع ...