الجمعة، 22 مايو 2009

فِـ عيد تدوينتك المِيّة ..

بسم الله الرحمن الرحيم

اعتدت على زيارة مدونة الزميل والأخ العزيز محمود أبو العزم - رحلة إلى نفسي – كل ثلاثاء ، فهو قد عودنا دائما على تدوينة جديدة في الثلاثاء من كل أسبوع – أو كما نسميه نحن – رواد مدونته – حديث الثلاثاء – ولكني وجدته هذا الأسبوع مختلف عن كل مرة ...

فقد فاجئنا – حوده – وهو الاسم الحبيب إلى قلبه بأن تدوينة هذا الأسبوع .. هي التدوينة (المئوية) لمدونته - أي التدوينة المئة - فكانت له احتفالية وإهداءات خاصة لزواره الكرام ...


هنا .. وجدت أن تعليق وتهنئة – لا يكفيان – لصديقنا العزيز ، وإذا بقلمي ، يكتب (ولأول مرة) بعض الكلمات بالعامية – التي يبدع فيها محمود دائما – محاولا التعبير عن مقدار الحب والتقدير والاعتزاز بـ (محمود) وبـ (مدونته) الحبيبة إلى قلبي جدا ..

وأترككم مع – فِـ عيد تدوينتك المِيّة -

وأنا قاعد أنا في خلوة *** لقيت القلب عنده كلام
لواحد حُبُه في قلبي *** معشعش .. والسبع تنعام


يا حوده .. دي مدونتك *** قرينا فيها أحلى كلام
كلام مليان بإخلاصك *** وإحساسك وصدق غرام
كلام عَمران بحب الله *** ده حُبُه يخفف الآلام
وحُب المصطفى الهادي *** ده هو شفيعنا خير ختام
وياما حكيت لنا حبك *** لأصحابك وللأرحام
دا حبك حتى بقى لينا *** شعاع نَوَُر في كل ظلام


مدونتك بتنقلنا *** من اللحظة .. إلى الأحلام
من الدنيا اللي واخدانا *** وواخده قلوبنا للآثام
إلى عالم ينسينا *** قلوب حاقدة وكارهة سلام


وليك في العشق إحساسك *** ده تعجز عنه الأقلام
أحِبِّك .. بس إحساسي *** مالوش في لغتنا أي كلام
أحبِّك .. بس إسلامي *** بيبعد عنا أي حرام
يانمشي في رضى المولى *** رضاه دا غاية الإِنعام
وزي ما رسوله قالها لنا *** نعيش بالحب أحلى وئام
يا نبعد احنا عن شرعه *** ويومها ما ينفع اللوام
رَضِيت المولى يا محمود *** وما عصيتوش في أي كلام
فَحَبِّبْ هُوّ فيك خلقُه *** وحتى طيوره والأنعام

(ملاحظة :الخطاب في أحِبِك الأولى والثانية السابقتين: للمؤنث ، أي بكسر الحاء والباء)

ولا عمري ما هنسالَك *** (قصيدة) بتوصف الآلام
آلام هي فـ ظاهرها *** بس القلب .. كله سلام
قصيدة لكل من ضحى *** وقدِّم روحه والأجسام
فدا دينه فدا وطنه *** لربه يرفع الأعلام


فِـ عيد تدوينتك المِيَّة *** بنبعت ليك بكل سلام
وندعيلك بأمنيّة *** يارب تحقق الأحلام
طريق الخير يِيَسَّر لك *** ويجعل خطوتك قدام

وصلي يارب في الآخر*** على الهادي وأولي الإكرام
صحابتُهْ اللي رضيت عنهم *** بأغلى صلاة وأزكى سلام

وكل مئة تدوينة و – رحلة إلى نفسي – بكل خير ، وعقبال التدوينة الألف بإذن الله تعالى .

هناك 17 تعليقًا:

د/عرفه يقول...

ايه لحلاوة دى يا عمر

واضح ان الكلام طالع من قلبك

فعلا


وعقبالك ما تكمل المية انت كمان

أحمد سعيد بسيوني يقول...

مهما نقول ومهما نعيد
هيفضل كلامنا عنه أي كلام

ده لأنه الغالي والمحبوب
ومدونته دي ليها أحلى سلام

Unknown يقول...

ربنا يديم عليكم الحب
والاخلاص فى الله ولله
صداقة وزمالة
الدراسة لا
تعوض

د.توكل مسعود يقول...

السلام عليكم ورحمة الله.. وبعد

فقد وحشتنى كثيرا ياعمر أنت ووالدك وأسرتك الكريمة ... كيف حال والدك أرجو أن تقرئه السلام...

ولكن كيف تكون بتحب النور ثم لاتخرج إلى النور إلا مرة كل فين وفين...

خليك فى النور على طول.....

أدام الله علينا وعليك نور البصر والبصيرة ....

جهاد يقول...

مدونتك بتنقلنا *** من اللحظة .. إلى الأحلام
من الدنيا اللي واخدانا *** وواخده قلوبنا للآثام
إلى عالم ينسينا *** قلوب حاقدة وكارهة سلام

.........
صدقت
ماشاء الله لاقوة إلا بالله
قصيدة جميلة ومعبرة جدا
بورك قلمك دكتورعمر
بارك الله فيكم جميعا

۩۝۩ Dr. Flavio ۩۝۩ يقول...

السلام عليكم ورحمة الله

ازيك يا عمر باشا

ايه الكلام الحلو ده

والله كلام جميل جدا ... كنت مودي الشعر ده فين يا باشا؟

تسلم ايديك يا نجم .. عجبني البوست ده جدا
ومش تغيب عننا بأشعارك يا باشا


منتظر القصايد يا كبير

عمر يقول...

د عرفة
دي حلاوتك يامحمد
ودايما منورني كده

فعلا طالع من القلب وأتمنى أن يصل إلى القلب

ولسه كتير على المية

عمر يقول...

أحمد باشا بسيوني

منورني والله

صدقت فعلا هيفضل كلامنا عنه أي كلام

وشكرا على كلامك لي خلف الكواليس

عمر يقول...

Norahaty

شكرا لمتابعتك للمدونة

اللهم آمين ربنا يديم الحب والإخلاص

وصدقت زمالة وصداقة الدراسة لا تعوض وأسأل الله أن تستمر

عمر يقول...

د توكل مسعود

وعليكم السلام ورحمة الله وبركاته

أهلا وسهلا بحضرتك ودائما منور المدونة ومشرفها

والله حضرتك والأهل وحشتونا أكثر

الوالد بيسلم على حضرتك كتير وأ.إسماعيل من عندكم اللي كان مع حضرتك بيسلم عليكم أيضا

بإذن الله تعالى سنظل دوما في النور ولحب النور نكتب

وأدام الله علينا جميعا نور البصر والبصيرة

جزيتم خيرا

عمر يقول...

د جهاد

أهلا بعودة حضرتك وزيارتك للمدونة

جزيتم خيرا على هذه المجاملة التي لا أستحقها

والله إنها كلمات تعبر فقط عن بعض ما في القلب لأخ حبيب

محمد عبد الباسط يقول...

انا لسه معلقتش؟

مبروك يا حوده وعقبال الالفيه ان شاء الله

وماشاء الله ياعمر قصيدة روعة والله

شكلك هتنافس قريب مع محمود
ههههههههههههههه

حلم كبير

عمر يقول...

شاعرنا الكبير محمود فرج

يامرحب يا مرحبا

اشكرك كثيرا على هذا التشجيع واحمدالله ان اعجبك هذا البوست

..........

بالمناسبة: اجدعن انت بس كمل المية وشوف هعمل ايه

عمر يقول...

محمد عبد الباسط - حلم كبير

واحشنا ياراجل مش ناوي تحن علينا بمواضيع زمان بقى

طبعا اول واحد شاف الموضوع وشجعني على النشر ، خلاص سماح المرة دي في التعليق

...........

هههههه
بس وسعت معاك اوي كده ، انا فين وحوده فين ، أشكرك على هذا الإطراء

محمود ابوالعزم يقول...

السلام عليكم ورحمة الله
والله يا عمري انت ماتعرفشي مدي السرور والسعادة اللي انت ادخلتهم على قلبي بكلامك ده
والله يااخي تعجز الكلمات
جزاك الله كل خير
وكل الناس اللي علقت
وبصراحة هستناكوا انت واحمد سعيد تنافسونا قريب في موضوع الشعر ده
بجد فيه كلام موزون وآخر جمال
ربنا يكرمك يا عمر
اللهم اجعلني كما يظنون
واغفرلي ما لا يعلمون

غير معرف يقول...

جميل اوي الشعر ياريت نشوف من ده كتير


عيون مسلمه

اعلاميه المستقبل يقول...

يسلم مخك اللي فكر في الكلام ده ويسلم احاسك الجميل ده وتسلم ايدك اللي كتبت الكلام الحلو ده ويسلم صاحبك اللي طلع المواهب ديه