الجمعة، 5 يونيو 2009

دمعة .. بتنعي عمِّنا مرسي


بسم الله الرحمن الرحيم

" عم مرسي " حكاية رجل مسن أصابه مرض القلب واحتاج لتغيير صمامات قلبه
ولكن الإهمال والروتين الممل الذي أصاب كل نواحي الحياة في مجتمعنا
وغياب الضمير والرحمة من قلوب بعض من يفترض أنهم ملائكة للرحمة
أوصلوه إلا أن أصبح لا علاج لحالته وأصبح حتى التدخل الجراحي فيه خطورة على حياته
ليبقى " العم مرسي " ينتظر الموت على فراشه
حتى توفاه الله ضحية لفساد مجتمعه .

حكاية " عم مرسي " تتكرر في بلادنا مئات المرات يوميا ، فهناك الكثير والكثير من أمثال " العم مرسي " والكثير الكثير من قتلة " العم مرسي "

هذه القصة مر بها أخونا الحبيب محمود أبو العزم ، وأبكى بها كل زوار مدونته – رحلة إلى نفسي – لأجد كلمات " محمود " تصل إلى أعماق قلبي لينفطر صارخاً ببعض الكلمات التي تعبر عما بداخله ..

أترككم مع

– دمعة .. بتنعي عمِّنا مرسي-


آه ياجماعة دي والله حكاية
من قسوتها دمعي غزير


دمعة .. بتنعي عمنا مرسي
والتانية .. دي بتنعي ضمير

والله ياحودة دا عمك مرسي
زيه كتير ، وكتير ، وكتير

اللي تعبوا وكمان شقيوا
وبيرضوا منُّه بيسير


ربوا ولادهم ويا احفادهم
بطيبتهم على حب الخير


لكن ، بعد ما شابوا وكبروا
واحتاجوا اللي يحب الخير

ما لاقوش اللي يخفف عنهم
دا ألمهم .. أي والله كبير

يوم ورا يوم يِدّهور حالهم
ومرضهم .. دا والله خطير

دا يطنشهم .. دا يهملهم
أصله في عرف الناس دا حقير


شهر بيجي ، وشهر يعدي
وهمَّ يعيني .. رهن سرير


غيرهم بالملايين يتسلُّوا
مليون ورا مليون بيطير

وإيديهم شغالة تَمَلِّي
للأوراق غش وتزوير

اخس عليكو يا ولاد بلدي
ولا عاد ذمة .. ولاّ ضمير


ولا عادت للدين في حياتنا
أي كرامة .. أو تقدير


أو حتى لو قلنا حضارة
بقى حضارتنا .. نؤذي الغير


ولاّ حضارة .. إننا نقتل
عمنا مرسي بدون تفكير


***

إياك تِيأس .. اوعى ياحودة
بكرة الناس هتقول تغيير

خَلّي أحلامك دي معقودة
على أجيال عز وتحرير


أجيال تكبر فيها مروءة
وشهامة مع حب الخير


تبني تعمّر مصر بجُودة
وضمير صاحي بدون تخدير


وترَجّع أمجاد مفقودة
أمجاد خالد ، ولا نُصِير

( خالد : الصحابي الجليل خالد بن الوليد - سيف الله المسلول

نُصير : موسى بن نصير أمير المغرب الذي أرسل مولاه طارق بن زياد ليفتح الأندلس " أسبانيا حاليا " )

ولغاية اليوم دا ما يجي
مش عايزين كدب وتبرير


عايزين كل الشعب ينادي
احنا تعبنا من التزوير

عمنا مرسي راح يا بلادي
ضحية مهمل ولاّ حقير

مش هنسيب للغش أيادي
ولا حتى مقدار قطمير


إيدي في ايدك يا ابن بلادي
دي بلادنا محتاجة تعمير


هنخَرَّج للحق أيادي
خيرها هيغمر حتى الطِّير


وهندعي الرب الهادي
يصلح حالنا .. وحال الغير

هناك 20 تعليقًا:

غير معرف يقول...

بسم الله ماشاء الله

د محمود ابو العزم لحد الان هو اللي خرج اجمل الكلمات للنور

تحياتي لك ولقلمك

عيون مسلمه

semsema يقول...

بسم الله

اللهم امين دكتور عمر
بارك الله
كلمات صادقة ومعبرة
ربنا يجعلنا أداة من أدوات الاصلاح والتغيير ولا يستعملنا للهدم والافساد
سلمت يمينك
دمت بخير

د/عرفه يقول...

لا بجد
جميل عمور

ايه ده
هتخلينى اصدق انك شاعر ولا ايه

Ramy Seada يقول...

أبو العزم لو شاف الكلام ده هيبطل يكتب تانى

إنت عندك الموهبة دى من زمان وكاتمها ليه

أنا بصراحة مش عارف أفرق أسلوبك عن أسلوب أبو العزم بجد

وبعدين الكلمات معبرة ومؤثرة تخرج من القلب إلى القلب

ربنا يوفقنى واياكم لفعل الخير

تقبل تحياتى

محمود ابوالعزم يقول...

والله رامي عنده حق
ايه يا عم عمر المواهب المستخبية دي
والله لو كان الموضوع ده بدري شوية لكنت طلعتك غصب عنك في ملتقي الشعراء
الكلام والمعني أجمل من بعض
ولي الشرف اني اسمي يتذكر في تالت
بوست عندك ..بجد أسعدتني يا عمر
أما الكلام بتاع الشعر بتاع التفيعلات والحاجات دي بلاش نخنق بيه الناس هنا
لينا كلام كتير فيه مع بعض
مستنين المزيد يا عمر

اعلاميه المستقبل يقول...

خلي احلامك دي معقوده
على اجبال عز وتحرير
اجيال تكبر فيها مرؤه
وشهامه مع حب الخير
تبني تعمر مصر بجوده
وضمير صاحي بدون تخدير
صح لسانك يا دكتور وعقبال ما نشوفك دكتور مشهور واداه من ادوات التغير القريب باذن الله بايمانك وعلمك وشعرك

۩۝۩ Dr. Flavio ۩۝۩ يقول...

بأمانه شديده .. أعلنت عن نفسك وأكدت موهبتك

الوزن جميل جدا والكلام مرتب ورائع

انطلق يا عمر ولا تعبأ بأعداء النجاح

فاهمني اقصد مين؟ ههههههههههههه

عمر يقول...

عيون مسلمة

أشكرك على هذه المجاملة التي لا أستحقها

وأنا أزداد شرفا إذا كانت كلماتي منبثقة عن تأثري بقصة لأخي الفاضل محمود أبو العزم

عمر يقول...

د سمسمة

شكرا لك

اللهم آمين

عمر يقول...

د عرفة

الله يكرمك يا محمد

مش قوي يعني احنا لسه على قدنا

عمر يقول...

رامي سعدة

أولا أهنئك على عودتك للكتابة
وعجبني موضوعك الأول بتاع قصيدة فاروق جويدة ويؤسفني أن تقوم طالبة في كلية الطب بسرقة كلمات لأحد الشعراء وهذا فقط لتنال اعجاب من حولها
للأسف من يفعل ذلك في الصغائر يسهل عليه فعله في الكبائر ( معلش بقه ما انت قافل التعليق عندك )

ثانيا :انا لو قريت الجملة الأولانية في تعليقك هنا لوحدها هفهم انك بتشتمني على أساس إني بخرب كلام محمود .
ههههه معلش بقه هو يستحملني شوية

لكن طبعا أنا لي شرف أن تشبهني بمحمود ربنا يكرمه

اشكرك على المرور

عمر يقول...

محمود أبو العزم

ايه ياعم كل المجاملات التي لا أستحقها

أنا فيه واحد صاحبي يامحمود عرضت عليه القصيدة وما كانش قرأ القصة اللي عندك قال لي بالنص :
برافو برافو برافو محمود انه عرف يحكي القصة بطريقة تخلي القصيدة دي تطلع من واحد ما يعرفش العم مرسي ولا عمره قابله

ففعلا يا محمود لو لم تكن القصة شديدة التأثير ما كانت الكلمات مؤثرة

ده انا اللي لي الشرف اني اكتب عنك للمرة الثالثة

ومستني منك بجد نقدك الشعري لأني فعلا محتاجه

عمر يقول...

إعلامية المستقبل

شكرا على كلامك الجميل الذي ينبئ عن إعلامية : مبدعة في مجالها خادمة لإسلامها وغزيرة بمعرفتها

ربنا معاك في الامتحانات

محمد عبد الباسط يقول...

اخي الكريم الفاضل / عمر النجار

الف مبروك على الخطوبة وربنا يتمم لك بخير وسلامى للعائلة الكريمة

اخوك محمد عبد الباسط

محمد عبد الباسط يقول...

اخي الكريم الفاضل / عمر النجار

الف مبروك على الخطوبة وربنا يتمم لك بخير وسلامى للعائلة الكريمة

اخوك محمد عبد الباسط

إسراء توكل مسعود يقول...

كل عام وأنتم إلى الله أقرب .. لكم في "بلاوطن" سلام وبشرى وهدية ..جزاكم الله خيرا

د.توكل مسعود يقول...

مبروووووووووك عليك التخرج يا دكتور عمر ... ولك هدية في بلا وطن .. نفع الله بك

غير معرف يقول...

كيف إني أسألك لمزيد من التفاصيل؟ عظيم آخر في حاجة الى معرفة المزيد...

Unknown يقول...


thx

كشف تسربات المياة
غسيل خزانات
شركة نظافة عامة

Unknown يقول...

اللهم اصلح حالا وارحم ضعافنا وعافى جميع المرضى اللهم امين


نقل اثاث


شركة كشف تسربات بجدة