حوار غريب جدا .. مع زميل مختلف جدا !!!

وأخيرا أخدت القرار إني أكتب الحوار ، بعد تردد طويل جدا

بصراحة شديدة .. أنا مش عارف هل الحوار غريب ولا لأ ، والزميل مختلف ولا عادي ، لكني بصراحة أشد لم أكن أتوقع أن هناك أحد في هذه البلد في مجتمعنا يعيش ما نعيشه ويعاني ما نعانيه ويفكر بنفس طريقة هذا الزميل ، الخوف يا جماعة لأطلع أنا الغريب جدا ومختلف جدا وهو اللي عادي جدا .. فياريت ماتحرمونيش من رأيكم عشان أعرف هو أنا الصح ولا هو ؟؟؟؟

.............................................................

عشان ما أطولش في الكلام أنا هحاول أختار مقتطفات سريعة من حواري مع زميلي الفاضل في نقاط سريعة ...

هو : ياترى انت رأيك ايه هو المنهج الصح اللي هيدخلنا الجنة واللي المفروض كلنا نتمسك بيه ؟

أنا : المنهج اللي الرسول صلى الله عليه وسلم سلكه .

هو : كل الناس بتقول كده ، أنا بأسالك عن منهجك انت ؟؟

أنا : لو جيت شفت الرسول صلى الله عليه وسلم في منهجه هتلاقيه بدأ بنفسه ولكنه بدأ يصلح اللي حواليه ، يعني ما قعدشي في الجامع وقال انا علي نفسي وفقط ...

هو : يعني كده انت شايف ان الناس الل بتعبد ربنا في الجامع وتحرص على العلم الشرعي فقط مش على منهج الرسول صلى الله عليه وسلم ؟

أنا : أنا ما قلتش كده ، كل واحد شايف الطريق الصح من منظور معين ، ومدام هو هدفه الخير ورضى الله عز وجل يبقى ده كويس ، ولكن في طريق أصح اللي هو اللي الرسول وأصحابه نهجوه انهم حاولوا ينشروا الخير في كل مكان ويحاولوا يصلحوا المجتمع اللي حواليهم

- المهم يا جماعة الحوار أخذ منحى آخر تماما ودخلنا في أوضاع البلد ....

هو : يعني انت شايف النظام اللي موجود حاليا كله فساد ؟؟؟

أنا : أنا ما قلتيش انه كل فساد ، ولكن معظمه

هو : هات لي أمثلة على الفساد ده ؟؟

أنا : البلد كلها مليانة فساد بشهادة الناس كلها من أول رغيف العيش ، لحد التعليم ، ومستوى الرعاية الصحية في المستشفيات ، والكوسة اللي مالية البلد ، والبطالة ....

هو : طيب ياعمي كل واحد مسؤول عن اللي هو فيه ، وهو اللي هيتسأل عنه يوم القيامة ، لكن انت مطلوب منك المكان اللي انت فيه اللي هو المذاكرة ، مش عليك تصلح البلد ، ولما تبقى تمسك حاجة ابقى حاول تصلحها

أنا : أنا ماقلتش أن أنا أسيب مذاكرتي بالعكس أنا الأولوية عندي لازم تكون للمذاكرة ، ولكن برضه أنا لي زمايل لازم إذا لقيت عند حد غلط أنصحه ، والموظف لما يلاقي في مكانه حاجة غلط لازم يحاول يصلحه ، والدكتور نفس النظام ، وكل واحد في مكانه

هو : طيب انت نصحت وما سمعشي النصيحة هو حر هو اللي هيتحاسب مش انت ؟؟

أنا : أنا معاك في كده لو كان ده هيضره هو لوحده ، لكن لو كان ضرر عام لأ لو أنا سيبته ربنا هيحاسبني

هو : بصراحة أنا شايف إن الحال ديلوقتي أحسن من خمسين سنة فاتوا ، بس طلبات الناس هي اللي زادت !!!

أنا : يعني ديلوقتي لما الناس ما تعرفشي تجيب رغيف العيش يبقى هي اللي طماعة ، لما تكون زجاجة الزيت بعشرة جنيه يبقى الناس هم اللي طماعين ، لما يكون دكتور تكليف بياخد متين وخمسين جنيه ولا المعيد مايزيدشي عن خمسمية جنيه يصرف منهم على البحث العلمي اللي بيعمله والأستاذ الدكتور ألف ونص بعد ده كله تقولي الناس هي اللي طلباتها زادت

المهم ... الحوار يوميها كان طويل جدا وأخد أكتر من نصف ساعة وحسيت ان احنا بندور في دائرة مفرغة ، استنتجت في آخرها إن الإعلام بتاعنا له تأثير كبير جدا في غسيل مخ عند ناس كتير جدا لدرجة .. إن الأوضاع اللي هو عايشها كل يوم أصبح لا يراها ولكن يرى ما يشاهده في التلفزيو ن .. غير نظرته لمختلف القضايا الأخرى زي الرئيس ، وأمن الدولة وشيخ الأزهر والمفتي والمعارضة والإخوان .. حسيت إني قاعد مع واحد قاعد في حتة تانية خالص مش مصر ، مع العلم إنه مش حزب وطني ياجماعة

ياترى هو اللي مختلف ولا يمكن أنا وانا مش دريان ، هو اللي غريب ولا أنا وأنا مش حاسس ... أفتوني يرحمكم الله