ألا ليت الطب كله .... أطفال

بسم الله الرحمن الرحيم

نور من أنوار كليتنا .... الأطفال

ياه وأخيرا ... بنتعلم طب ، بنشتغل دكاترة ، بنحضر عشان نستفيد مش عشان ناخد الغياب

الله أكبر ... فينك يا أطفال من زمان ، فين المرور يوميا على العنابر ، فين الاستمتاع بالراوند وبشرح الدكتور ، فين الجلوس في المقاعد الأمامية ، فين العدد الذي لايزيد عن ثلاثين طالب في الراوند ، فين انك تخرج من الراوند وانت فاهم وحافظ وبتعرف تطبق ، فين القسم اللي ما بيستنزفشي جيوبنا عشان حالات ما بنشوفشي فيها حاجة ، ولا بنشتغل عليها ، فين الراوند اللي الواحد بيخاف يغيب فيه وإذا غاب بيحزن عشان اللي فاته ، بصراحة - وبدون كتر كلام - كنت فين يا راوند الأطفال

مائة وخمسون يوما من الحضور لأجل الحضور وفقط ، تأتي في الموعد المحدد لأجل الغياب وفقط ، وتظل لآخر الراوند لأجل الغياب وفقط ، تتحمل من يعجبك ومن لاتفهم أو حتى تسمع منه شيئا لأجل الغياب وفقط ، وتتحمل الحضور لأجل الامتحان وفقط ، باختصار شديد أنت في الباطنة العامة

هذا كان باختصار شيد the difference between the pediatric & general internal medicine

مدى النعيم في الأطفال ومدى المعاناة في الباطنة العامة

بصراحة يمكن يكون الاحساس ده لأن احنا الراوند الوحيد اللي عاش 150 يوم متواصلة باطنة عامة يروح وييجي 150 يوم وتسأله استفدت ايه ؟؟؟ القليل القليل ان كنت قد استفدت شيئا

الأطفال ... والجودة

ولكن ياجماعة بمنتهى الصراحة خلونا واقعيين ، احنا بقى لنا فترة بنسمع عن الجودة ونظام الجودة وعايزين يعترف بينا ككلية عالمية وشهادتنا تبقى معترف بيها ، بصراحة الكلام ده كله أنا ما كنتيش مستوعبه ، مع ان احنا كنا عملنا استبيان وسط الطلبة وعملنا حوار مع أحد الأساتذة أعضاء لجنة الجودة في الكلية ونزلناه في جريدة ( وشوشة ) ، لكن بصراحة التطبيق على أرض الواقع مختلف تماما عن الكلام النظري ، ولم أستوعب ذلك حتى دخلت قسم الأطفال لأجد معظم ( ولا نقول كل لأن الكمال لله وحده ) خصائص الجودة متوفرة فيه

ـ احترام مواعيد بدء الراوند

- 4ساعات عمل دؤوب ( ولو إن دي لها عيوبها الجسدية إللي يعرفها كل اللي داقها ، لكن كله لأجل العلم !!!!! )

ـ الراوند مقسم لمجموعات صغيرة حتى يسهل الاستيعاب وتطبيق نظام التفاعل بين الطلبة والأساتذة

ـ المرور على العنابر للتطبيق العملي على المرضى

ـ اصطاف دكاترة على أعلى مستوى من العلم والاحترام

ـ متابعة يومية من الأستاذ الدكتور رئيس القسم

ألا ليت الطب كله .... أطفال

بصراحة ياجماعة فعلا لو احنا عايزين كليتنا الحبية يعترف بيها لازم نتخذ قسم زي قسم الأطفال قدوة لينا ، وزي ماقلت لكتير من زميلنا تمنيت لو راوند واحد من 3 راوندات باطنة عامة ( يعني 50يوم فقط من المائة وخمسون يوم ) يطبق فيه ما يطبق في الأطفال ، وده فعلا هيفرق جدا مع الطلبة أثناء حضورهم في الباطنة ، وكذلك في مستقبلهم كحياة عملية ، وكذلك في التفاعل من قبل اصطاف الدكاترة ... هي أمنية من الأماني وأعتقد أن النجاحات تبدأ من الأماني والأحلام

وختاما لا أنسى أن أشكر قسم الأطفال على الجهد المبذول ، ونتمنى منهم الثبات والتطور للأفضل ، والاعتذار إن كنت قد قسوت على الباطنة ولكن .... إنما هو حرص على نجاح كليتنا

ويارب نعيش لليوم اللي تكون فيه كليتنا كلها ........أطفال ، لتكون كلها ....... أنوار